ललितपुर । प्रतिनिधि सभा निर्वाचन नजिकिँदै जाँदा ललितपुर क्षेत्र नं. २ का मतदाता यस पटक उम्मेदवारभन्दा पनि एजेन्डामा केन्द्रित देखिन थालेका छन्। नेवाः सभ्यता र सांस्कृतिक पहिचानको सवालदेखि शहरी विकास, सुशासन र रोजगारीसम्मका मुद्दाले चुनावी बहसलाई निर्देशित गरिरहेको छ।
यस क्षेत्रमा राष्ट्रिय स्वतन्त्र पार्टी (रास्वपा), नेपाली कांग्रेस, नेकपा एमाले र नेपाली कम्युनिस्ट पार्टीका उम्मेदवारबीच प्रतिस्पर्धा रहेको छ। फरक राजनीतिक पृष्ठभूमि बोकेका उम्मेदवारहरूले मतदाताको विश्वास जित्न आ–आफ्ना प्राथमिकता प्रस्तुत गरिरहेका छन्।
रास्वपाका उम्मेदवार एवं पूर्व सञ्चार तथा सूचना प्रविधिमन्त्री जगदीश खरेलले नेवाः सभ्यता, मठमन्दिर र सांस्कृतिक सम्पदाको संरक्षणलाई केन्द्रमा राख्दै आफूलाई परिवर्तन र सुशासनको पक्षधरका रूपमा प्रस्तुत गर्नुभएको छ। मन्त्री पदबाट राजीनामा दिएर निर्वाचन मैदानमा उत्रिनु खरेलको राजनीतिक जिम्मेवारी र प्रतिबद्धताको सन्देशका रूपमा मतदाताले हेरेका छन्। निजी क्षेत्रको प्रवर्द्धन, सार्वजनिक सेवा सुधार र यातायात पूर्वाधार विकास उहाँको मुख्य एजेन्डामा छन्।
नेपाली कांग्रेसका उम्मेदवार प्रेमकृष्ण महर्जन अनुभवी संगठन र निरन्तर राजनीतिक अभ्यासका आधारमा मतदातामाझ उभिनुभएको छ। प्रदेश सभाको अनुभव बोकेका महर्जनलाई कांग्रेसले स्थिरता र संस्थागत नेतृत्वको प्रतीकका रूपमा अघि सारेको छ।
नेकपा एमालेका उम्मेदवार प्रेमबहादुर महर्जन अघिल्लो प्रतिनिधि सभा कार्यकालको अनुभवका साथ पुनः मतदाताको विश्वास खोज्दै हुनुहुन्छ। एमालेले निरन्तर विकास, योजनाको निरन्तरता र पार्टी संगठनको बललाई चुनावी हतियार बनाएको छ।
नेपाली कम्युनिस्ट पार्टीका उम्मेदवार राजेन्द्र अमात्य पहिलो पटक संसदीय प्रतिस्पर्धामा उत्रिनुभएको हो। वैकल्पिक वाम राजनीति र स्थापित दलप्रतिको असन्तुष्टि बोकेका मतदातालाई आकर्षित गर्ने प्रयासमा उहाँ देखिनुहुन्छ।
ललितपुर–२ मा यस पटकको निर्वाचन जित–हारभन्दा पनि मतदाताले कस्तो प्रतिनिधि खोजिरहेका छन् भन्ने प्रश्नसँग गाँसिएको छ। पहिचान जोगाउने नेतृत्व, प्रभावकारी विकास मोडल र विश्वासिलो सुशासनमध्ये कुन पक्षले मतदाताको मन जित्छ भन्ने निर्णय अन्ततः मतपेटिकाबाट हुने देखिन्छ।
